पोखरा । चिल्ड्रेन नेपाल पोखराले पोखरामहानगरपालिका- ९, बसपार्कस्थित सहारा बाल आधारभूत विद्यालयलाई १४ सेट सिलिङ पङ्खा हस्तान्तरण गरेको छ ।
चिल्ड्रेन–नेपालका कार्यकारी निर्देशक डिल्लीप्रसाद शर्माको अध्यक्षता र पोखरा महानगरपालिका-९ का वडाध्यक्ष दीपेन्द्र मर्सानीको प्रमुख आतिथ्यमा भएको कार्यक्रममा उक्त सामग्री विद्यालयकी प्रधानाध्यापक लोचना अधिकारीलाई हस्तान्तरण गरिएको थियो । प्रमुख अतिथि मर्सानीले संस्थाले उपलब्ध गराएको १४ सेट सिलिङ पङ्खा वायरिङसहित जडान गर्न वडा कार्यलयले सहयोग गर्ने प्रतिबद्धतासमेत जनाएका थिए । संस्थाले बालबालिका र महिलाको क्षेत्रमा विगत लामो समयदेखि गरेको योगदानको प्रशंसा गर्दै आगामी दिनमा पनि वडा कार्यालयले संस्थासँग सहकार्य गर्ने उनको भनाइ थियो ।

कार्यक्रममा सोही वडाका सदस्य नन्दुराम गिरीले चिल्ड्रेन नेपाललाई धन्यवाद दिँदै संस्थाबाट उपलब्ध स्रोत साधनको उच्चतम प्रयोग गर्दै संरक्षण गर्नुपर्नेमा जोड दिए । विद्यालयकी प्रधानाध्यापक लोचना अधिकारीले उपस्थित प्रमुख अतिथि,अतिथिलगायत सम्पूर्णलाई स्वागत गर्दै विद्यालयको समसामयिक गतिविधिहरूको जानकारी दिइन् । प्रअ अधिकारीले चिल्ड्रेन नेपालले विपन्न बालबालिकाहरूसम्म शिक्षाको पहुँचमा पुर्‍याएको योगदानको प्रशंसा गरेकी थिइन् । संस्थाका कार्यकारी निर्देशक डिल्लीप्रसाद शर्माले विद्यालयको विगतको अनुभवलाई स्मरण गर्दै अहिले विद्यालयमा भएको बालबालिकाहरूको सहभागितासँगै शैक्षिक प्रगतिको प्रशंसा गरे । उनले संस्थामा स्रोत साधन उपलब्ध भएको खण्डमा विद्यालयलाई यस खालको सहयोग आगामी दिनमा पनि गर्ने प्रतिबद्धता जनाए । चिल्ड्रेन नेपालले हरेक गतिविधिहरू गर्दा वडा कार्यालयसँग सहकार्य र समन्वय गर्दै जानेमा उनको जोड थियो ।

संस्थाका वरिष्ठ कार्यक्रम अधिकृत शारदा शर्माले संस्थाको सहयोगमा यस वर्ष ३२ जना बालबालिकाहरूले सहारा बाल आधारभूत विद्यालयमा पठनपाठन गरिरहेका र बालबालिकाहरू र उनीहरूको परिवारको सशक्तीकरणमा विभिन्न गतिविधिहरू पनि सञ्चालन गर्दै आइरहेको कुरा बताइन् । कार्यक्रमको सञ्चालन चिल्ड्रेन नेपालका सह संयोजक रमेश सुवेदीले गरेका थिए ।