पोखरा । पत्रकार प्रदिप पौडेलको सम्मानमा पोखराका विभिन्न सञ्चार संस्थाले बिदाइ कार्यक्रम सम्पन्न गरेका छन् ।

यसै बिच रेडियो बाराहीका समाचार प्रमुखका रूपमा कार्यरत पौडेलको शुक्रबार उक्त रेडियोले औपचारिक बिदाइ गरेको छ । विगत १५ वर्षदेखि कार्यरत पौडेल निकट भविष्यमै सपरिवार संयुक्त राज्य अमेरिका बसाइँका लागि जाँदै छन् ।

कार्यक्रममा रेडियोका कार्यकारी निर्देशक रमेश पौडेलले रेडियोको विकासका लागि दरिलो खम्बाका रूपमा रहेका प्रदिपको अभाव महसुस सधैँ हुने बताए । प्रदिपले रेडियोका हरेक पक्षमा खेलेको भूमिकाको प्रशंसा गर्दै पौडेलले प्रदिपले जहाँ रहे पनि पत्रकारिता र बाराहीप्रति सदा साथ पाउने आशा व्यक्त गरे ।

बाराही प्रसारण प्रा. लि.का अध्यक्ष सुनीलकुमार गोशलीले व्यवसायीले सञ्चार माध्यममा लगानी गरे पनि हस्तक्षेप गर्न नहुने मान्यताबाट आफू अघि बढेको धारणा राखे । पत्रकारिता भन्ने कुरा छुट्टै पेसागत विषय भएकाले यसको विकासका लागि स्वयम् पत्रकारहरूलाई नै जिम्मेवारी दिइएको भन्दै गोशलीले प्रदिपले बाराहीको उत्थानका लागि खेलेको भूमिकाको प्रशंसा गरे ।

सो अवसरमा पौडललाई रेडियोका अध्यक्ष गोशली र कार्यकारी निर्देशक पौडेलले सम्मान गरेका थिए ।

पत्रकार प्रदिप पौडेलले आफूले करिब २ दशकको पत्रकारिताको आफ्नो यात्रामा बाराहीलाई पाठशालाका रूपमा लिएको बताए । पोखरामा रहेर पत्रकारिता गर्दा अनेकौँ मिडियामा आबद्ध भए पनि रेडियो बाराही आफ्ना लागि विशेष रहेको उनको भनाइ थियो । बाराहीमा रहँदा सिकेको ज्ञान र सिपलाई आगामी दिनमा पनि प्रयोग गर्ने प्रदिप पौडेलले प्रतिबद्धता जनाए । उनले पत्रकारिताका क्रममा सहयोग र हौसला दिने सबैलाई धन्यवाद दिए । बाराहीमा २०६६ देखि आबद्ध उनी रेडियो बाराहीका समाचार प्रमुख र इमेज च्यानलको पोखरा ब्युरो प्रमुखका रूपमा कार्यरत थिए । उनी प्रेस युनियन कास्कीका सचिव, नेपाल पत्रकार महासङ्घका गण्डकी प्रदेश सदस्य तथा नेपाल फोटो पत्रकार सङ्घ, कास्कीका निवर्तमान अध्यक्ष पनि हुन् ।

रेडियो बाराहीका सहकर्मीहरूका तर्फबाट गोविन्द सुवेदीले शुभकामना दिँदै प्रदिपलाई कर्मठ पत्रकारका रूपमा चित्रण गरे । रेडियोको असल चिन्तक र कार्यान्वयनकर्ताका रूपमा रेडियोले प्रदिपको अभाव सधैँ खड्किइरहने सुवेदीको भनाइ थियो ।

अध्यक्ष सुनीलकुमार गोशलीको अध्यक्षतामा भएको कार्यक्रमको सञ्चालन दीपेन्द्र पहारीले गरेका थिए ।

यसै बिच, शुक्रबार नै प्रेस युनियन र नेपाल पत्रकार महासङ्घ, कास्कीले पनि पौडेलको सम्मानमा बिदाइ कार्यक्रम गरेका छन् । यसअघि नेपाल फोटो पत्रकार सङ्घ, कास्की र नेपाल पत्रकार महासङ्घ, गण्डकी प्रदेशले पनि उनको सम्मानमा बिदाइ कार्यक्रम गरेका थिए ।